الشيخ عبد الله رشدي والحرب الممنهجة ضده



الشيخ عبد الله رشدي والحرب الممنهجة ضده
الشيخ: عبد الله رشدي - مصر 






الكاتب: عمر ابراهيم 

الشيخ عبد الله رشدي ومناظراته الرائعة التي اطاحت بجميع مناظريه بلا استثناء


كتب: عمر إبراهيم 

في مقال لإدواردو جاليانو عن دور الإعلام، قال إن الإعلام بيصنع الواقع وليس العكس، يعني الإعلام يقدر يحول شخص بطل أنقذ قرية كاملة من الهلاك لشخص هو المتسبب في هلاكهم .

اللي بيحصل مع الشيخ . عبد الله رشدي  ده شئ بصراحة خرج برة حيز إنه شيخ، أو إنه بيدافع عن متحرش زي ما بيقولوا، الموضوع أقرب لإنه حملة ممنهجة، حاجة شبه مغالطة رجل القش، إنك تسمع رأي حد، وتحوله لفكرة تانية خالص، وتبدأ تنتقد الفكرة اللي خلقتها مش الكلام نفسه .

طول عمرهم بيقولوا الشيخ ده منظره مقزز عشان بيلبس عبايات ورجعي مش مواكب الموضة، الراجل طالع بأشيك لبس عادي ومواكب الموضة، فظهرت مشكلة جديدة إنه رجعي عشان مواكب الموضة .

طول عمرهم بيقولوا الشيخ ده شوال قاعد وكرشه مترين، الراجل مهتم بلياقته، فاتحول لإنه مهتم بجسمه عشان يثير الستات .

طول عمرهم بيقولوا اللحية دي رمز للإرهاب وشكلها مقرف، الراجل لحيته خفيفة، فبقت المشكلة إنه مش شبه الأزهر أبو لحية كبيرة المعتادة .

الراجل ناظر كل فئات المجتمع، من مدعي الألوهية، لإسلام البحيري، لمفكرين، لدرجة إنه راح قناة Dw الداعمة الأبرز للشواذ والملحدين وناظر، ومعندوش مانع يناظر أي حد، فظهرت حجة جديدة إنه مدعوم من جهات بتجهزله الردود، ده لو مبيعرفش يقرأ ويكتب ودجال وقادر يواجه كدة يبقى حفيظ عبقري، يعني واحد ميح عنده الثبات الإنفعالي ده بيحفظ كل الاسكريبتات، لا ده احنا نكرمه بقى، يبقى فين بتاع شو وبيفرض قوته على ناس ضعيفة؟

الراجل يقول اللبس، يقولوله اختار وقت تاني تتكلم فيه وجرم التحرش، يجرم التحرش من قبل حتى ما يقولوا ويوضح إن ليه عقوبة في الإسلام زيه زي الاغتصاب، طب خلاص، امتى بقى يتكلم عن الاحتشام؟ بعدين، طب لو اتكلم هتسمعوله يعني؟ لا ما هي دي حاجة متخصوش، بس ربنا أمر بيها في أي وقت وفي كل زمان؟ لا ما في اختلاف على تفسير الآية، مين اللي اختلف؟ احنا 

طب الراجل ربنا يكرمه عامل فيديو بينصح الشباب والبنات يبطلوا العادة السرية؟ هنقص جزئية بينصح فيها البنت اللي بتعاني من كدة إنها تلتزم البيت والزواج زي ما الرسول أمر، وهنعمله حالة جدل وكل واحد هيخش يقوله أمي عملت وسوت إنت مين، والراجل لا أختص أمك ولا يقصدها هي، ده يقصد البني أدمة الضعيفة زي ما قال على الشباب، وأمر الاتنين يتجوزوا عشان ميعملوش حاجة حرام ربنا ناهي عنها في القرآن .

طب الراجل لا اتكلم أصلًا عالموضوع بتاع المتحرش، جبتوا ليه سكرينات من سنة وخليتوه هو المتهم عشان تفرغوا فيه غضبكم بدل ما تفرغوا في الشاب المتهم نفسه؟ عشان هو بيبرر، طب ما هو متكلمش أساسًا، والمتحرش ده باعتراف ضحاياه كان بيستدرجهم عشان سلطة ونفوذ أهله مش عشان سمع الشيخ بيقول .

باختصار الموضوع فعلًا واضح، خصوصًا على حوار الفيديوهات اللي بتتقص ويتبني عليها آراء من رواد تويتر اللي ده مصدر رزقهم، واللي بيحاولوا بكل الطرق يثبتوا إن الشيوخ دول شياطين ماشية عالأرض .

*********************************************

المجلة: مقال جميل شامل والشيخ عبد الله رشدي يستحق منا جميعا كل خير وتقدير .. بارك الله فيكم وجزاكم كل خير 

0/أكتب تعليق

أحدث أقدم