احنا اولى بلحمنا وبدمنا - مجموعة قصائد الشاعر/ أشرف الشناوي ( شاعر عاميه- البرامون) - مصر Colloquial poetry


احنا اولى بلحمنا وبدمنا - مجموعة قصائد الشاعر/ أشرف الشناوي ( شاعر عاميه- البرامون)  - مصر   Colloquial poetry

احنا اولى بلحمنا وبدمنا - مجموعة قصائد الشاعر/ أشرف الشناوي ( شاعر عاميه- البرامون)  - مصر  

مقدمة 

الشعر ديوان العرب، تاريخ قديم حديث من الإبداع، من الفكر، من مناقشة كل شئون الحياة، فقد كان الشعر يدخل في  كل شيء في حياة العربي، من حديث عن الذات وعن الغير، وصف وتحليل هجاء ومدح، كل ما كان يمت لمعيشتهم بصلة، يكتبون عنه شعرا،  واستمرت حياتهم هكذا، وفي كل عصر تجد المبدعين، والذين يشكلون تاريخا مشرفا من العصر الجاهلي وحتى يومنا هذا، وظل الشعراء يحددون ويبدعون ويتنافسون ، حتى وجدوا ألوانا حديثه من الشعر والذي سيظل ومهما مر عليه الزمن، ديوان العرب.. 
إلى النصوص:

*******************************************************************************************************

(1)

قلبى الابيض

بقى ضلمه
من كتر ايديكوا
الظالمه 
اتغير نوره
لعتمه 
وانكسرت فيه
النشوه 
واتقفل الباب
المفتوح 
على نفس الحلم
المدبوح
رافض حتى
يسامح 
من كتر الدمع
المالح 
من كتر القسوه
اللى شايلها 
والناس اللى بتطفى
فى قناديلها
قلبى بيمسحها
باستيكه
بيغنى ويسمع
مزيكه 
أنا قلبى خلاص
اصله اتعلم 
من كتر ماعاش
كدا واتألم 
لايحب فى يوم
تانى ويسلم 
قلبى خلاص 
منكوا اتعلم
هايعيش درويش 
وهيكتب 
على بابه مفيش 
حد يحاول
يدخل ويعيش
قف 
نقطة تفتيش  
قلبى بقى جيش
احزان 
بعد ماكان انسان
اصبح مارد 
م الجان 
من غير عنوان  
مكتوب 
على بابه 
ميت من كتر
الحرمان 
او مغلق للترميم 
مش طالب
احسان  
قلبى اللى ملان
عصافير 
ماتت من ذل
الغربان 
قلبى اللى بيشغى
غناوى 
طارح سنط
مكان الكتان 
قلبى خلاص بقى
مسرح 
الكل بيطلع
ويدوسه ويفرح 
ويسيبوا المسرح
عريان
ويسيبوا المسرح
عريان..... 
***********************

(2)

ولما عينيكى

تندهلى

باقول حاضر
واسلم نفسى
لايديكى
رضا خاطر
وطول عمرى
بقول قلبى
كدا شاطر
وعمرى ماكنت
باحسبلك
ولا غلطه
وادارى الجرح
جوايا
واخبى الحزن
فى عينيا
واقول بكره
هنتقابل
ونتصافى
واعاتب روحى
وارضيها
واعديها
مدام بتحب
هتسامح
ياواد الحب
مش مالح
اكيد بكره
هتلقاها
بتضحكلك
تدوب تانى
وتنسى الجرح
وتسلم
واول لما تتكلم
تحس الدنيا
لون تانى
تلاقى القلب
بيرفرف
وبيخترف
تدوب فى عينيها
وتسافر
وتكتب شعر
عالوافر
بلاش العند
يوم ياخدك 
دا ساعة الهجر
مية ساعه
هتفضل تنكوى
بنارها
وقلبك يبقى
مش طايق
ويمشى معاك
ماهوش فايق
ويفضل بيها
متشعلق
ويرسم فيها
ويبحلق
وكل شويه هايلومك
ريحتها لسه
فى هدومك
مادام العشق
سجانه
اكيد هيحب أحكامه
ولو حاكم
بااعدامه
هيرضى بحكمه
ويسلم
فسيبه لوحده
يتعلم
فسيبه لوحده
يتعلم.....

*************************

(3)

لو خايف
خليك

فى مكانك
كسر بايديك
 احزانك
الحلم دا عاوز
ارض براح
لا دموع
ولا حتى جراح
الحلم
دا زى العصفور
عاشق للفضا
والنور
ويموت لو كان
ورا سور
دووس
على وجعك
لو كل العالم
خدعك
او خاااان
احجز لك
فى الصبح
مكان
واخطف كام
ضحكه فى ايدك
تكسر بيها
الاحزان
واوعاك
تنسى انك
مخلوق
انسان
واكيد هاتشوف
الضى
وتعدى لو قلبك
حى
بس انت بلاش
تفضل خايف
م الجى
واحلم لو مش لاقى
غير دمعك
مى
هتعيش
وتطير
وهتلقى مكان
وسط العصافير
وهتنسى السجن
اللى ملان
مسامير
والجرح المفتوح
جواك
بضمير
من الناس
اللى انت اديتها
كتير
وخانوك من غير
تفكير
وسابولك احزان
قناطير
حاول تانى
بكره اكيد هتطير
بكره اكيد
هاتطير..........

************************

(4)

ليه بنسيب
الخوف جوانا

يكبر ويودينا
فى خانه
ننسى قلوب
وقفت ويانا
لما الدنيا
كانت نسيانا
ليه بنخلى
وجعنا مرايه
ليه بنخاف
م اليأس نعدى
او فى الحزن
نعيش ضحكايه
كل مانبدأ نقلب
صفحه
نلقى فى اول
سطر نهايه
ليه الدنيا
تملى تكشر
لما تشوفنا
بتبقى حكايه
نعمل من احلامنا
مراكب
هما يعيشوا
واحنا نحاسب
نزرع نور
يطرح م الضلمه 
خوف من بكره
وأيده الظالمه
نفضل طول عمرنا
مساجين
نحلم دايما
بالحريه
بس تكون بره
الزنازين
نحلم لما نطير
هانعدى
قبل الباقى مافينا
يصدى
والا هنفضل كدا
بنعافر
كل مايطلع فجر
يسافر
ويغربل فينا الاحزان
ويكتف افراحنا
فى روحنا
يستكتر فينا
النسيان
ويسيبنا لوحدينا
نكسر
م الاول
كل الجدران
ويسيبنا لوحدينا
نكسر
يانكمل وسط
الاحزان
يانكمل وسط..الاحزان

*****************************

(5)

مش راح اقولك
تانى تعالى

ومدام قلبك
كدا بتعالا
مش راح اقولك
تانى حبيبى
دا انت يوماتى
بالفين حاله
لو حبيتنى بجد
هتعرف
إن أنا دايب
فيك وزياده
بس طاوعنى
بلاش القسوه
تخسر حب حقيقى
ونشوه
تفضل طول الليل
حيران
تحسب مين فينا
الخسران
اصل الحب دا
مش بأيدينا
لما بيدخل قلب
يبان
تلقى الدنيا
بقت الوان
ساعه تعدى
الشوق يغلبها
وساعه تحس
انك بردان
واما تحس انك
بتقرب
تلقى الروح بطير
طيران
لو بتحب صحيح
صدقنى
حبك هيخليك
انسان
حبك هيخليك
انسان.....

***************************

(6)

وحياة الوجع

اللى بيكبر
جوايا
لا اعلق فى
ووشوكم
عا الحيطه
اللى ورايا
وادق فى نن
عينيكوا
المسامير
وهاغير اساميكم
ياحمير
لو قلبى فى يوم
عنكوا سالنى
هحرقه وارميه
جوا البير
ملعون الدم
اللى ربطنا
وسط الطراطير
وحياة الوجع
اللى مالينا
بكره الايام
هاتعدينا
نحلم ونعيش
وتعلينا
والصبر هايطرح
ونغنى
والصبح هيطلع
بتائنى
وتزقزق تانى
العصافير
والشمس هتطلع
وتدفى
والحلم هناخده
ومتشفى
من ايد امشير
وهتفضل عالحيطه
صوركم
ويوماتى نعدى
نفكركم
هتعيشوا
وتموتوا
حمير
هتعيشوا
وتموتوا.....حمير

***************************

(7)

الدنيا ماشيه

بتتقصع
لابسه الخلاخيل
وكل مانقرب منها
تهرب وتميل
نضحك ونستغرب
حالها
زى المهابيل
ويوماتى بنعافر
فيها
ناكل فى نجيل
نحلم وفى الاخر
نلقى
احزان قبابيل
ننام ونستنى
عدلها
تدينا هلاهيل
يادنيا مالك واخدانا
مكوى وغسيل
وشوشونا م الملح
دى دابت
زى المناديل
وقلوبنا م الصبر
استكفت
طفحت مواويل
يادنيا مالك بكفايه
شغل المساطيل
ويوماتى فى الصبر
نكسر
كدا بالازميل
بالليل ننام ويا وجعنا
شايلين مية فيل
ودموع تنور
ليالينا
زى القناديل
والصبح يطلع ويشقشق
والجرح عويل
راكب على كتافنا مدلل
رجليه مشاليل
يادنيا نفسى
اشمت فيكى
وارد جميل
يادنيا نفسى
اشمت فيكى ...وارد جميل

*****************************

(8)

مش هاقولك

إن أنا الواد التمام
اللى ياما
حلمتى بيه
أنه فارس فى المنام
والا راعى للسلام
والا هقدر
يوم اجيبلك
حته من قلب السما
تعملى منها الحزام
والا أخلى دنيتك
حب وغرام
مش هاقولك
ماانتى شايفه
كل حاجه والسلام
ايوه بافحر عاللى باقى
جوا منى لو كلام
بس ايه يعنى الكلام
يعمل ايه بس
الكلام
يالا نفطر بالكلام
والا نتغدا بكلام
والا نتعشا بكلام
والا ندفع كهربا وميه
بكلام
والا ينفع فى العلام
ايوا دا كان اختيارك
لما يعنى اخترتى
حبى
هى دى بداية
الكلام
قلبى كان هو المدار
صدقينى لما اقولك
إن أنا طافح مرار
وان بكره زى بعده
نار بتاكل
وش نار
بس مين ياخد قرار
قبل مايعدى النهار
والا ننسا م الهزايم
امتى كان آخر
انتصار
لما اشوفك
فى الحريقه
داخله بالنيه البريئه
قلبك المليان
عياط
والأمل زى السياط
كل يوم يجلد
فى روحك
تحت بند الاحتياط
والهزيمه اللى فى عنيكى
قلعت فيا البلاط
والهزيمه اللى فى عنيكى
قلعت فيا
البلاط...........

***************************

(9)

مالوش لزوم

تقلعى ليا
الهدوم
بلاش مناهده
وفرهضه
دا الضرب
فى الميت حرام
أنا كل مادخل
معركه
القانى وحدى
ويا أسرى الانهزام
والقاكى وسط
جيوش كتير ه
حاطه فوق صدرك
وسام
دايما وشايف
ضحكتك تكبر
وتعلا بالالام
مالوش لزوم
انك تقولى بس
شاورى
هتلاقينى فى لحظه
انام
صدقينى هى دى
كل الحقيقه
مش كلام
لما باحلم بلقى
حلمى جوا منى
سجن مقفول البيبان
وألقى روحى سور
بيعلا
وألقى فوقه ام الغيلان
مالوش لزوم
حربك معايا
ماانتى عارفه انى جبان
وانى وسط النور
باضبش
يمكن القى فى يوم
مكان
او يحس القلب
لحظه بالامان
او الاقى ضحكه
ضايعه من زمان
او الاقى روحى
تانى
بعد ماخدها الطوفان
او الاقى روحى
تانى
بعد ماخدها الطوفان......

******************************

(10)

قررت انى ابعد

عنكم وارتاح
يمكن يطرح
فيا البعد شوية
افراح
او اشوف الضحكه
تطل فى اى صباح
او اشوف الضى
فى عين الليل
مصباح
او الاقى فى قلبى
مكان
او حته براح
علشان الحلم
الفاضل فيا
يبطل مرازيه
ويدينى المفتاح
افتح باب السجن
المقفول
واشوف ايه حي
ومين مقتول
وادور عالضحكه
التايهه
اللى قتلها الغول
واعيش من تانى
العمر فصول
أنا كنت زمان
باعشق نوار الفول
وتاخدنى الاحلام
زى الحواديت
واعيش جواها
فارس وعبيط
وساعات بنحس
بروح العفاريت
فنخاف ونام
ونغطى فى روحنا
ونحس بدقة قلب
اللى فى ريحنا
ولحد الصبح مايطلع
وتشقشق تانى
العصافير
بنطير
ونكمل تانى الرسمه
بطباشير
قبل الدنيا ماتصبح
كلها امشير
مش كنا زمان
اجمل بكتيير
مش كنا أما بنزعل
نحلم
ونطير
ليه بس الحزن
ياخدنا لبير
ونتوه عن بعض
وتكسر فى قلوبنا
المشاوير
مش كنا أما بنزعل
نحلم
ونطير
مش كنا زمان
اجمل بكتيييير ......

*****************************

(11)

ياللى شايلين
السبح

صوتى اتنبح
ياللى بتقيموا
الصلا
وبتسجدوا
وقت الفرح
ياللى حجيتوا
الحرم
عقلى اتخرم
ازاى تعيشوا
بالف وش
وانتوا اللى دايما
تنجحوا
ماكفايه غش
والطيبين اللى
بصحيح
دايما نصيبهم
دود فى مش
ليه تطولوا
وايديكوا بطول
السما
رغم العما
رغم الغبا
رغم القلوب الضيقه
والمشنقه
للطيبين
تحت الرحى
تلقى العجين
تلقى العرق
شق الجبين
تلقى الوشوش
متسمرين
تلقى العيون
مليانه طين
حتى الامل
طالع حزين
حتى السبل
ناسى الحبل
والحلم نايم
فى العسل
والصبح خايف
يتقتل
ويوماتى بنشيل
الوجع
نقرا الكفوف
نضرب ودع
نحلم ودايما
ننخدع
بكره الميزان
راح يتعدل
طول ماالامانى
بتتزرع
والخوف هايهرب
م القلوب
طول مالقلوب
حاسه الشبع
هاتشوفوا مين فينا
اتخدع
ياللى انتوا شايلين
السبح
غيركم وقع
غيركم وقع ....

******************************

(12)

وليه بندارى فرحتنا

وليه الفرح سكتنا
وبعد ماشوفنا سكتنا
وليه الخوف مشتتنا
ياريت عشنا وعششنا
وليه مانطرش ونغنى
مادام الجرح متغمى
ونحلم مره من تانى
بلاش الحزن يرمينا
ينسينا أمانينا
تتوه الضحكه
فى وشوشنا
فيكبر وسطنا خوفنا
ونرجع تانى نتمنى
نخش برجلنا الجنه
ونخطف حتى لو ضحكه
تطمن فينا لو روحنا
وننسى بكره وجروحنا
ونرجع تانى مطرحنا
نعيش الباقى لو ثانيه
خلاص العمر بيسافر
سنين فى الدنيا بنعافر
ويكسرنا الزمن ونقوم
ونتكفا
ويتشفا
مدام قاعد على الدفه
بيدفا
على قلوبنا اللى فى اللفه
ماتعرف عوم
ونرجع تانى نتوضا
ونتغطا
نكمل نوم
ونرجع تانى نتوضا
ونتغطا
نكمل نوم
ياريت نلحق ولو ساعه
فى اخر يوم
خلاص العمر بيفرفر
واخر قطر بيصفر
يدوس عالورد
ويعفر
وناس بتلبى وتكبر
ماحدش فينا
بيتأخر
ماحدش فينا
بيتأخر ...........

******************************

(13)

باسمع اسمك

وباسمى
اسمك ساكن
وف دمى
لو طالبه الروح
أنا مستنى
دا أنا دايما
عاشق وبغنى
وحياة المنبر
والمدنه
وكنيسه بتحميها
ولادنا
لانشيلك فى الروح
والننى
لو حاربك فرعون
او جنى
بقلوبنا هنفضل
نسقيكى
ودموعنا هترسم
لياليكى
ولا شبر يضيع
من اراضيكى
هنام ازاى
وانتى فى حيره
وقلوبنا بتتسابق
غيره
ماهو ربك خلقك
وكبيره
بتشيلى حمولك
وتعدى
عالشوك والنار
كدا بتخطى
ولا عمرك يوم
تقفلى بابك
هانحنى كفوفك
بعرقنا
ويكمل حلمك اشواقنا
وهنروى غيطانك
بالراحه
وهنقعد ونقول
بصراحه
وهنسهر فى القمره
نغنى
وهانسمع حواديت
الغوله
وهنلعب منديل
والاوله
وهنرجع من اول
اولى
نتهجى حروفك
ونتئتأ
والصبح هايرجع
ويشقشق
وحمام الدار يملا
هديله
نسمع من تانى
ف ترتيله
والصبح هيطلع
وبخيره
ويلم فى حجره
اوام طيره
والشمس هتطلع
وتدفى
ورغيفك زايد ومكفى
ياجمالك والناس
ملفوفه
لهواهم دايما موصوفه
عشاق وقلوبهم
ملهوفه
دايما بايديكى بتسقينا
وازاى هانتوه
عن بعضينا
دا المركب مالهاش
غير مينا
مهما الايام هاتودينا
هنلف ونرجع
من تانى
علشان مانكمل غناوينا
علشان مانكمل
غناوينا.........

****************************

(14)

بهلوان انا

وف سيرك بطنطط
من كتر همك وانا
ماشى وباتخبط
باحلم واقول يمكن
بكره هاتتظبط
والاقى ضحكة امل
فيا وبطعبط
وانسى الجراح والوجع
واركب واتشعبط
الاقى سقفى اتخرم
والدنيا بتنقط
وناس بتملا المخل
وخلق بتلقط
وناس قتلها العرق
وخلق بتشقط
وخلق خادها الهوى
على ناس كتير وطت
وناس تلاقى الفرح
منصوب وبتنقط
وناس تلاقى الوجع
فى السكه مطلبط
قطعت ومن لحمها
 وياما كتير غطت
لناس ومن دمها
لناس كتير وضت
ولما خلص السيرك
الخلق دى اتفضت
ولما خلص السيرك
الخلق دى اتفضت.......

***************************

(15)

احنا اولى
بلحمنا وبدمنا

هاتهم ياريس
عندنا
واللقمه تتقسم
سوا
حتى المكان
والا الدوا
حتى الهوا
هانقسمه
دول برضه
حته مننا
لو قولنا اه
هيقولوا برضه
زينا
لو قالوا اه
برضه هتوجع
قلبنا
هاتهم ياريس
عندنا
دا الرزق نازل
م السما
هاتهم يعيشوا
وسطنا
ربك كريم
لم العيال
لم الحريم
دى برضه حاجه
فى وشنا
وازاى نسيبهم
عالبيبان
وسط الكلاب
وسط الحيتان
تنهش وتاكل عرضنا
هاتهم ياريس
عندنا
لم اللى باقى منهم
مين اللى هايشيل
همهم
ربك هيبعت
رزقهم
بكره الوطن
يرجع وطن
ونروح ونيجى عندهم
هاتهم هنا
صون دمهم
لم الغلابه م الشتات
دا الظلم دوله
من ساعات
والحق قايم للممات
بكفايه ليهم
جرحهم
والحلم تايه وسطهم
هاتهم ياريس
لمهم
هاتهم ياريس
لمهم
هاتهم ياريس..لامهم

************************************************************************************
نصوص رائعة لشاعر غاص في هموم مجتمعه الكبير، بلغة راقية بسيطة مفهومة، دام التألق والإبداع شاعرنا القدير، موفق دائما ان شاء الله تعالى.


0/أكتب تعليق

أحدث أقدم